تداول رواد مواقع التواصل الاجتماعي والسوشيال ميديا مقطع فيديو عن فاة أبناء الإعلامي حنفي السيد، مقدم برنامج عيون الشعب، يبدأ كلامه بعد مقدمة تم حذفها "فين وفين على المغرب لما لقيت واحد بيفتح عليا وانا بارن على بنتي.. مين معايا؟ قلت له إنت مين؟ قال لي إنت على واحد في الميكروباص، قلت وقعت منها.. أشكرك. قال لي لأ دي حادثة.. شد حيلك.. صاحب الموبايل ده مات. قلت التلاتة ولادي. قال لي كل اللي في الميكروباص توفوا.

وأضاف "جريت دخلت مستشفى.. ولادي التلاتة نايمين جنب بعض. أنا اللي قتلتهم.. أنا اللي دخلتهم الميكروباص بسبب الاجتماع. ما سمعتش كلام امهم اللي من أول يوم كانت بتنبه على ولادها ما تركبوش غير القطر. جريت على مراتي قالت لي إيه اللي ركِّبهم ميكروباص؟ قلت لها ما اعرفش أنا وصلتهم للقطر وفضلت واقف، بس انا كنت مستعجل، يكونوا نزلوا؟

قالت لأ، القطر لقوه هيتأخر راحوا ركبوا ميكروباص.

كدبت ما قدرتش أقول لها أنا اللي قلت لهم لأ لسه بدري على القطر".

وتابع الصحفي حنفي السيد "التلاتة يا رب. طاب خلي لي واحدة.. طاب خلي لي اتنين واخد واحد. ليه يا ربي التلاتة؟ للدرجة دي بتحبني؟ إن الله إذا أحب عبدا ابتلاه، طاب ابتليني ف عيل، وخلي الاتنين، طاب ابتليني في اتنين وخلي لي واحد. تبتليني بالتلاتة ليه؟ 

التلاتة أكفنهم واغسلهم وادفنهم بإيديا وانا اللي قتلتهم.. كان عايزين يروحوا القطر، وانا خوفي عليهم لزمن اشوف القطر وهو ماشي وانا مستعجل على الاجتماع. قلت لأ أركبهم ميكروباص المرة دي هيجرى إيه يعني؟ ما الناس كلها بتركب ميكروباصات، إشمعنا يا رب ولادي؟ هو انا عملت إيه عشان تحبني الحب ده كله وتبتليني في التلاتة؟ أستغفر الله العظيم.

واختتم الإعلامي حنفي السيد بقوله "بنتي لما كانت بتشاور لي من شباك الميكروباص كانت بتودَّعني، ولا كانت بتقول لي ليه يا بابا كده؟ ما اعرفش.

التلاتة دفنتهم في قبر واحد، ورجعت زرعتي كلها راحت، هازرع من تاني؟ يا ريت كان ينفع. أمهم بتموت، وانا عايش حياتي كلها صورهم أدامي ما بتفارقش عينيا".

ورغم الأداء المؤثر للإعلامي حنفي السيد، وتداول المقطع على نطاق واسع، حيث حقق على فيسبوك 1٫4 ألف مرة تشغيل، وعلى صفحة فيسبوك أخرى أكثر من 5 آلاف تعليق و517 ألف مشاهدة، وعلى يوتيوب 2,594 مشاهدة، إلا أن الحقيقة هي أنه كان يحكي قصة من ضمن القصص التي يحكيها في برنامج آخر له، وهو "حكايات مستخبية"، كما يظهر في تعليق أحد ناشري الفيديو"تعديل الحادث لشخص يدعى محسن على لسان الأستاذ".

وبث ناشر آخر للفيديو على صفحته بالفيسبوك مقطع لجنازة الأبناء.

وعلق عليه بقوله "الله يصبر قلبك يااستاذ حنفى انت ومامتهم ويرحمهم يارب".